تساؤﻻت للثوار...وكل واحد فيكم على كيفه يختار

•  يعني إيه ثورة؟ هل اللي حصل في مصر ده، سياسيا، يعتبر ثورة وﻻ إنتفاضة وإحتجاجات واسعة بس؟
•  "حاكموهم" دي بتطلب تحديدا من مين يحاكم مين؟
•  لو وصفتك ﻹسقاط النظام والثورة هي اﻹحتجاجات الشعبية زي اﻹعتصام والمظاهرات والذي منه...إشمعنى ما نجحتش في سوريا بنفس النتائج على اﻷقل اللي حصلت عندك؟ مش بتقول إن اﻹعتصام شال مبارك والحزب الوطني والكام حاجة دول؟ ليه ما نفعش هناك؟
• هل "الثورة" دي عواقبها وآثارها من إزالة رموز في السلطة، أضرت بالنظام وﻻ ساعدته في التخلص من عناصر في كانت مزعجة بالنسبة له (جمال والشلة)؟
• كلنا بننتقد إن النخب والسلطة بيأثر فيها التعريص اللي حصلها، هل تظن إننا أثر فينا (كـ"ثوار") التعريص اللي حصل لنا بعد ١١ فبراير وإننا عملنا الفشاشيخ وسوينا الهوايل؟ تفتكر صدقنا نفسنا زي ما اللي في السلطة بيصدقوا نفسهم وﻻ ﻷ؟
• هل فيه ثورة في التاريخ مش منظمة؟ ثوارها نزلوا بشكل عشوائي ضد عدو مش عارفينه أو فاهمينه (بدليل تأييدهم للمجلس العسكري) ليأتوا بنصر غير متوقع ومحسوب؟
• كمية المطالب اللي طالبنا بيها لنفسنا أو حطيناها أولوية لنفسنا (حرية تعبير وعقيدة...الخ) هي هي من مطالب "الشعب" اللي ٤٠٪ منه تحت او على خط الفقر؟ او على اﻷقل من أولوياته؟
  بنشتغل عشان أولوياتنا وﻻ بنشتغل عشان اولويات الشعب؟...وﻻ بنشتغل نفسنا والشعب؟
  (الكلام عن المطالب السياسية واﻹجتماعية، بعيدا عن الحقوقية)
• قلتلي اللي حصلت بقى إسمها إيه تاني؟...
• عمرك سمعت عن ثوار، كل غايتهم وهدفهم ﻹسقاط حكم العسكر او واتيفر، هو إنهم يبقوا مصدر إزعاج؟