ما بعد اعتصام 8 يوليو: علم في المتبلم

تصوير: نورة شلبي 

ما بعد اعتصام

8 يوليو:

 علم في المتبلم

اعتصام 8 يوليو اتفض بشكل مؤسف . الاعتصام اللي كان بدأ عشان حق المصابين و اهالي الشهداء يرجع .

الصراحة هي إن كل الاسف كان على المعتقلين و اعتداء الجيش; الناس كانت عايزة تفض الاعتصام عشان تعبوا صراحة إنما وش مش بالمنظر ده اللي رجالة و ستات انضربوا من قواتنا المسلحة البواصل و اهالي الشهداء اتسحلوا.

بغض النظر, كتير اتعلموا حاجات اكتر بسبب الاعتصام ده; من اول طبيعة الشعب و خراه لغاية هل فعلا احنا قد الاعتصام في ميدان التحرير ؟

للأسف الظاهر إن كمية قليلة اتعظت من البلاوي اللي واجهناها في الاعتصام.

اللي هحاول اعمله هو وصف حقيقة الاعتصام فعلا و الدروس اللي أنا استفادتها منه

اعتصام 8 يوليو: القصة بدون مونتاج

أنا كنت في المجموعة اللي كانت عند خيمة لا للمحاكمات العسكرية

خليني أبدا و اقول إن الاعتصام كان بعيد كل البعد عن الشاعرية و الافلاطونية الشاذة اللي الاعلام و النشطاء صوروها:

·         كمية الزوار و السواح رهيبة; تقريبا ماكانش فيه متظاهرين, ناس جاية تتفرج على الساورة و تمشي

·         البلاوي اللي بتتحدف عليك ما تعدش, من اول اللي مش عايزين اختلاط في الخيم للدعارة و المخدرات اللي متوزين على الميدان للبلطجية على البوابات

·         النيلة الاكبر هي الاختراق; احنا تقريبا كنا,كنشطاء, مخترقين اعتصام المخابرات و التحريات العسكرية والمخبرين, لو الحكم بالعدد

·         عددنا كنشطاء و ناس فعلا جاية عشان قضية كان قليل فشخ; الباقي كله كان مأجورين و تحريات عسكرية  و بالعافية كنا عارفين نمسك بوابتين

·         الحر…

·         مفيش دعم من الشارع ولا أي تضامن; لدرجة إن الناس كانت بتهتف للجيش و الامن المركزي (الامن المركزي !) لما كانوا بيفضوا الاعتصام و بيشدوا الناس في المدرعات

نأسف على تحطيم احلامكم لكن ارجوا إن يكون ده فهمكوا ليه أنا بنط في كرش أي واحد يجيب سيرة الاعتصام في ميدان التحرير تاني

الدروس المستفادة  

·         احنا مش قد ادارة اعتصام في ميدان التحرير: لا  احنا عددنا يكفي  (احنا اللي هما الناس اللي نيتها خالصة من النشطاء و المتضامنين معاهم) ولا منظمين بشكل مناسب ولا قادرين نعمل , و الاهم, نحمي نظام نمشي عليه

·         حلم مشترك بدلا من عدو مشترك: كمية الاختلافات و الصدامات اللي هتحصل  و حصلت بين الطبقات المختلفة في المجتمع المصري بسبب انعزالهم عن بعض رهيبة. لو مش مدي سبب أو حلم الناس تستحمل بعض عليه بدلا من عدو مشترك (مثلا: الشعب يحكم بدلا من مبارك يمشي) مش هيبقى عندك أي وحدة أو, فعليا, أي حاجة

·         الاعتصام و التظاهر ما بقاش بياكل مع الجيش و المجلس

دي اهم حاجة في رأيي . آخر اعتصام ورانا إن المجلس مش واكل من شغل قفل ميدان التحرير; ده كان مع النظام اللي قبل كده, لكن النظام ده تأقلم مع الكلام ده فاصبح بالنسبة له ولا حاجة...لكن برضوا الناس مصرة على التعامل معه بنفس طريقة التعامل العقيمة

بلاش, شوفنا في 9/9 إن المسيرات هي الشغل كله; بتصحي الناس و بتعمل منظر و سوكسيه لا يعلي عليه بدل من شغل المنصات و الوقفة في التحرير …تقوم تلاقي الجمعة اللي بعديها ناس عملت مظاهرة في التحرير من اياهم رفضا للطواريء 

الحكمة بتقول إنك لو ماشي في سكة عشان تنطح في ثور, و نطحته  و وقع, بعدين قام و لف وراك; لازم أنت كمان تلف له; مش معقولة تفضل تحاربه بالمشي في نفس الاتجاه و هو, لامؤاخذة, بيديك من ورا

لسة الباقي جاي