Anti-هبل

هبل-Anti

صباحو...

موضوعنا النهاردة عن الهبل اللى بشوفه من البعض على تويتر بالذات فيما يخص الساحة الثورية

الهبابة دى القصد منها ساخر و حتى إن كانت بتتكلم عن بعض المواقف الهبلة لبعض من اللى أعرفهم, هذا لا يقلل إحترامى و حبى لهم ولا يعنى انى ماليش حاجات أهبل منهم

الفكرة إن تعلمنا أن المؤمن لا يلدغ من جحر مرتين. و حتى لو مش مؤمن فأكيد لازم هيجيله وقت و يتعلم من غلطاته و يبطل يعملها...مش كدة؟

لأ مش كيداهو !!! طاصاوَّار؟؟؟؟

المواضيع دى هى تجميع لأكتر حاجات إتكررت عليا

سحب الثقة: بصفتك ايه يا حبوب؟؟

اللى فاكر أول إجتماع لمرشحى الرئاسة اللى طلعوا بيه بمطالب يقدموها للمجلس ينفذها و إلا هيسحبوا الثقة منه؟

سيبك إنهم جابوا ورا و "سحبوا سحب الثقة"...

فى إجتماع بين كذا قوة سياسية إتفقوا على فاعلية يجمعوا بيها مطالب الشعب و,برضوا, يقدموها للمجلس و لو ما إنفذتش يسحبوا الثقة...

القوة, بصراحة فى الساحة السياسية فى إعتقادى, من الآخر, إتنين: إما عسكرية (سلاح و عساكر) أو شعبية (ناس وراك بتمثلهم و مستعدين يدافعوا عن مصالحهم)

طيب, عندنا مجلس عنده سلاح و هذا ما لا شك فبه...و عندنا قوى سياسية "لا تمثل إلا نفسها" (مش الشعب أو شريحة منه)

فعليا؛ إنت كسياسى لو لا تمثل إلا نفسك فأنت سياسياً فراغ, مالكش وزن

و هو ده اللى بيحصل لأن اللى شايفه فى أسلوب المجلس مع الإحتجاجات هو "ورينى آخرك لو دكر..."

"هتسحب الثقة؟ إسححححب...هاه؟ بعدين؟"...و هنا موقف العيل بالكلوت وسط طابور الصباح

بس...

جزء من المشكلة هو شغل "القوى السياسية" اللى مش لاقى رواج مع كتلة حرجة من الشعب و جزء تانى و أهم هو ثقافة الشعب اللى بيبص للقوى السياسية و بيدور على حد يعمل له اللى هوا عايزه من غير ما يتعب أو يخاطر

دى المشكلة أو الموقف ببساطة من منظورى...كونك لسة بتتكلم إن الشارع معاك أو "إن شاء الله" هيبقى معاك أما تنزل مظاهرة لله فى لله كدة و إنت لا نزلت ليهم ولا سمعت لهم ولا وفرت لهم وسيلة للتعبير عن رأيهم ولا حتى رؤية أو حلم يا محترم يتلفوا حواليه...يبقى طبيعى لما المشير ينزل لهم ببدلة يبقى هيسورقوا و يقولوا كس أمك !

 

دراما الإسلامجية: "هم مش قالوا مش هيعملوا كدة؟؟؟"

(الإسلامجية: وصف لمن (شخص أو جماعة) يدَّعى الإسلام و دائما مرتديا "الطقم" ولكنه لا يفهم فيه شيئا و آخره يكر اللى حافظه على الدراويش اللى معاه)

علمنا الإسلامجية بدناءتهم و تعودنا عليهم متاجرى بالدين لأجل مصلحة شخصية؛ سياسية أو مادية و منعدمى المبادئ (برجاء النظر فى التاريخ صفحتى كاموليا شوحاتة و سيد بلال)

إشطة. قبل 25 يناير: المظاهرات دى حرام عشان الخروج عن الحاكم

بعد 25 يناير: الثورة دى جائت لنا نصر من عند الله عشان الظلم اللى شفناه, تكبيييييييير !!! - الإخوان: مش هنستهدف غير 20-30-50-80-90% من مقاعد البرلمان و مش هنرشح

بعد 25 يناير بشوية كمان: المظاهرات كفر و خروج عن الحاكم و اللى بيدعوا لها ناس كخة عايزين يخربوا البلد و السبوبة اللى بتأكنا عيش – حد ناسى جمعة السلفيين يا عرب؟!

الإخوان: بديع: تأييد الإخوان لمرشح للرئاسة شىء سابق لأوانه ولن نعلن قرار إختياره إلا بعد غلق باب الطعون...

زى ما عودونا دائما...

الفكرة فى الأخبار اللى لسة بترف على هذا النمط:

حتى لو عطوفى بيهرج فده لا يمنع إن فيه ناس بشوفها لسة بتذبهل بنفس هذا القدر أو أكتر كمان...رحماك ربى و رضاك

قانون الغدر... اللى هيحمينا من الفلول

لسة فيه ناس تعقل و تفقه وسطنا متخيلة إن قانون الغدر لو إتفعل فى ظل حكم المجلس و القضاء الأهبل ده هيخلينا نحاكم و نقصى فلول الحزب الوطنى و نطهر الساحة السياسية من الفاسدين...

طيب, إنت عارف إن قانون الغدر ده بيبقى المحكمة بتاعته فيها 4 ضباط جيش بيشاركوا فى قراراتها؟

بلاش, ده قانون إستثنائى و له إجراءات إستثنائية...إمتى آخر مرة إجراء إستثنائى فى مصر إستخدم فى حاجة مفيدة أو كويسة؟؟؟؟؟

قانون الطوارئ (عهد مبارك) كان لتجار المخدرات و الإرهاب...إتطبق على مين؟

قانون البلطجة اللى بيحيل "البلطجية" للمحاكم العسكرية...إتطبق على مين؟؟

تفتكروا قانون الغدر هيتطبق على الفاسدين من السياسيين؟... ولا "العملا الخونة" زى بتوع البرادعى و 6 إبريل؟