الحتة الشمال: هي العجلة شغالة اساسا عشان الإضراب يوقفها ؟؟

الحتة الشمال: هي العجلة شغالة اساسا عشان الإضراب يوقفها ؟؟

الحتة الشمال بيبقى اهداء لليساريين. أنا لا يساري ولا مثقف اقتصاديا زي معظم اليساريين اللي اعرفهم لكن بعرف افك العقد على قدي

موضوعنا عن الاضرابات اللي خدعوك فقالوا انها بتوقف عجلة الانتاج و وجهة نظر العمال و ما يحدث فعلا نتيجة سياسات الدولة في القطاع ده

بطل الحلقة, برنس الجنس, عمي: عمي مستشار كيميائي تخصصه دهانات الخشب و مشرف في مصنع و بقاله اكتر من 10 سنين شغال في مصانع مع العمال على طول.
يساري و تقريبا اناركي ; نجح في كل مصنع يشتغل فيه انه يعمل من العمال اللي تحته مجتمع مصغر فيه تضامن اجتماعي رهيب بينهم و بين بعض  ده غير إن عماله بيبقى عندهم حب غريب لمهنتهم و حرفتهم هو بيشجعه و بينميه فيهم
(لما زرت المصنع , كل واحد من العمال على آلة كان حاطط جنبه حاجة اللي هي قمة ابداعه و عمي كان بيفوتني على واحد واحد يخليه يوريني شغله J)

يعني من الآخر راجل اعتبره يساري عقلا و موضوعا و ممارسة اكتر من نظريا

الحوار يا حلوين كان عن عجلة الانتاج و إن الاضرابات و الاعتصامات بتوقفها. إذ افاجأ وسط عيلتي الكنباتية عمي طرح وجهة نظر جديدة بعيدا عن حقوق العمال و مشروعية الاضراب و المطالب...ألا و هي “هي العجلة شغالة اساسا؟؟؟"

إيه الحوار

كلنا ممكن نتخيل المعاناة اللي بيعانيها العمال, بغض النظر عن رأيك فيهم, من اول الاجور الزهيدة الغير متماشية مع المخاطر اللي بيواجهوها  (ده اذا اخدوها في معادها اصلا) لغاية التأمين الصحي و الحماية من الأخطار و الضمان الوظيفي

في القعدة اللطيفة جت سيرة عجلة الانتاج اللي الاعتصامات و المطالب الفئوية بتوقفها

عمي : "هي العجلة ماشية اساسا؟ انتوا بتتكلموا في إيه ؟!
عندك مثلا المستثمر يبقى الدولة بتديله قرض 10 سنين بدون فوائد و اعفاء ضريبي و دعم كهربا و غاز, يفتح المصنع, تخلص ال10 سنين, يقفله و يغير نشاطه  أو يخلع "

ده ملخص الحوار , و لنا في حالة  مصر المنوفية للغزل و النسيج عبرة )فيديو)

تحليل على القد

دلوقتي الدولة بتدي للمستثمر دعم و هوباب ازرق عشان ينتج; الدعم ده المفروض الفايدة منه تيجي على الشعب و المنفعة العامة : اما الانتاج يزيد أو الاسعار تقل و البطالة تقل و حاجات كتير تانية...

الافتراض هنا إن المنفعة عادت على الشعب و البلد و العمال , مش جيب المستثمر, ده هيحصل
(خلي بالك دايما إن أي نظرية اقتصادية نتائجها بتعتمد على افتراضات مسبقة: قد ما الافتراضات موجودة, النتائج هتتحقق و العكس)

قوم إيه بقى يا جدع, الحكومة  دلعت المستثمر كل ده و مفيش ضمانات حقيقية )أي إن مفيش ضمانات خالص أو ضمانات سهل التهرب منها) تخلي الدعم اللي بياخده يعود على المنفعة العامة, ولا رقابة إن ما كانش فيه تواطؤ

و ده تعريف الفساد, أو شكل من اشكاله: إن المنفعة العامة, بسبب القائمين علي توزيعها, يحولوها لمنفعة خاصة

بالتالي, المستثمر بيجيله دعم و حاجات حلوة و بيطالب منه يديها للعمال و الشعب من غير أي رادع عن انه يعمل غير كده

اللي بيحصل, زي ما قلنا, يجي وقت رد الدعم و القروض, المستثمر يخلع و المصنع يتقفل أو يتشقلب بين الادارت و الملاك

بالتالي المصانع تقف, العمال ما تشتغلش )مش عشان مش عايزة, عشان مش عارفة)...كمل أنت...شاطر:
العجلة تقف

النتيجة اللي أنت بتشوفه دلوقتي; عمال بيتظاهروا و بيعتصموا  عشان المصانع تشتغل
العمال بيضربوا عن العمل عشان المصانع تشتغل عدل و يجيلهم حقهم اللي بيعرفوا يشتغلوا بيه

قول لي بربك; لو أنت عندك عيلين, بلاش, عيل واحد و بيت...تصرف عليه إزّي بـ400 جنيه في الشهر؟
ده لو افترضنا أنك بتقبض في المعاد, اللي هو نادرا ما يحدث …بالمنظر ده, عندك سبب إنك تشتغل ؟

ده فهمي للموضوع و برجاء الملاحظة طبعا إني مدرك شوية بسيطة على قدي; تحتمل الخطأ و , بل ترحب , بالتصويب

ده اللي شايفه الحالة العامة, دونا عن  الاستثناءات