قصة الملك والساحرة، عن غباء الدولة والأمن نتحدث

في القليل مما  تابعته وتفكرت فيه، مع الحديث مع كذا زميل وزميلة من أنصار وجهة نظر أن أجهزة الأمن "اغبياء" ومش عارفين يعملوا إيه أو بيتخبطوا، إفتكرت قصة بسيطة وبليغة سمعتها من فترة

ملك مرة طرد ساحرة من مملكته، الساحرة إنتقمت إنها بالليل دخلت المملكة وسممت البئر الوحيد اللي كل الناس بتشرب منه

اليوم اللي بعده كل الناس شربت من البير الا الملك، بالصدفة، ما شربش

فجأة، لاحظ الملك إن كل الناس إتجننت بسبب السم.

يحاول يناقشهم، يحايلهم، مفيش؛ إتجننوا كلهم

ماشي مش عارف يعمل إيه، عدى جنب اوضة وسمع ناس من حاشيته بيتكلموا...
بيقولوا "لازم نعمل حاجة في الملك، ما ينفعش السكوت عليه بالمنظر ده؛ ده إتجنن!"

الملك، محبط، لقى نفسه ماشي لغاية ما بقى فجأة قدام البير...البير المسوم

شرب منه

تاني يوم النبلاء والوزراء إحتفلوا في الشوارع إن الملك أخيرا شفي من جنونه ورجع لعقله

------------------------------------------------------------------------------

كتير إتكلمنا عن غباء الأنظمة الحاكمة في التعامل مع الإحتجاجات وإن ده بيفشخهم

ممكن نقول إن فعلا المقاومة والقمع بالذات يوم 25 يناير وما بعده هو اللي إدى معنى لميدان التحرير والإحتجاجات وخلى البعض يسميها ثورة
متخيل، وده تخيل، إن لو العادلي ومبارك سابوا الناس تعتصم في التحرير يوم 25 وجابوا شفيق ومحدش إتعرض ليهم...تقريبا كان يوم 28 ده الشعب هاينزل عشان يفضي الميدان

لكن نكمل: دايما الحديث مستمر دلوقتي وبعد التنحي عن الأسلوب الغبي اللي بيتبعه النظام في البروباجاندا والإعلام  والقرارات والتصريحات

أي نعم، التصريحات غبية؛ زي مؤخرا تصريح مراد موافي (مدير المخابرات سابقا) إنهم لم يتوقعوا أن يقتل المسلم أخاه المسلم...

وقبلها التصريحات في مجلس الوزراء والكنتاكي وحماس...

أيوة، تصريحات غبية

لكن حد أخد باله إن الناس هديت وبتناقشها والبعض بدأ فعلا يصدقها او يميل لتصديقها؟

الكلام عن التمويل والتعاون التخابر مع جهات خارجية و"الطرف التالت"...مين دلوقتي مش مصدقه؟ بعد ما كانت ثورة شباب طاهر

يكفي إن المعظم صدق كلام الإعلام المعرص أما عرص للثورة والثوار، يكفي إننا الوحيدين اللي بنسميها ثورة (زي ما إعلامنا سماها) وكل وكالات الأنباء، اقلهم حفاظا بتسميها ثورة والباقي بيسميها أحداث أو تظاهرات 25 يناير

يكفي إن أسلوبنا الشيك المحترم ما جمعلناش أيتها تأييد ولا حتى طلع مننا كادر سياسي فعال يقدر يأثر على إتخاذ القرار في البلد لصالحنا ولو شوية

كتير برضوا من أنصار إن الأمن والإستخبارات أغبية ومتخبطين وإننا بنبوظلهم خططهم، بيعتقدوا إن الجماهير ذكية وواعية وفاهمة هي عايزة إيه وفاهمة بتعمل إيه....

إستنتاجي لكل ما سبق؟
إن الجماهير مش ذكية، إن أسلوب وخطاب المخابرات والأمن غبي...لكن شغال ومناسب للجماهير
وإن خطابنا الذكي المحترم المفترض إن الجماهير ذكية، مش مناسب ولا شغال معاهم
وإن كمان أسلوب الإعلام والأمن وخطابهم الغبي بيأثر فينا شخصيا؛ راجع تريقة الناس على تويتر على مراد موافي بسبب تصريحه على سبيل المثال

يكفي إن حركة الإقالات اللي حصلت وأنا في نص التدوينة دي، ناس شايفاها "إنجاز"

يكفي كل ما سبق بالنسبة لي لإثبات إن جايز الأمن والإستخبارات غبية أو على الأقل خطابها غبي، وجايز الجماهير غبية، لكن إحنا اللي أكيد مش أذكى من أي حد فيهم

وكما تقول الحكمة الصينية: لا يوجد أغبى من يفترض الغباء في عدوه

وسايق عليكم النبي محدش يقول على الناس النشطة والكتلة الحرجة "ثوار"...والنبي