ناقصين مؤذن و خليفة ...

شايف الاغنية دي, شغلها !

....

يا سلااااااام...

موضوعنا النهاردة: وصلنا لفين, و هل ينفع نتحد تاني ؟

اولا, وصلنا لفين:
فاكرين لما قعدت اقول أسباب إن احنا شكلنا محتاجين ثورة تانية ؟
آه... طب اخبطوا دي:

تفاصيل اعتقال الناشطة سلمى الصاوي و اختطافها 

اول زيارة ورا الشمس...في مصر الثورة 

"انتوا فاكريين ان المجلس العسكرى ولا اللى جاى بعده هينفعكوا ده اقل حكم 3 سنين واللى هيكسر اشاره مرور هياخد 5 سنين واللى هيغلط هنجيبوا وهيتحاسب واللى مش هيغلط هنجيبه ونلفقلوا"

" ونادى عسكرى وطلعنى بره وشال اللى على عينى ةبقيت فى الصحراء اللى عند مبنى امن الدوله اللى فى اكتوبر على طريق هايبر"

آدي ده اللي وصلنا له ... ده على الصبح كده 

عشان فعلا اتصدق لما اقول إن "اقتحام" امن الدولة في مدينة نصر كان ولا اقتحام ولا حاجة و إن الجيش هرب الضباط من مبني مجاور و فتح البوابات للنشطاء عشان "يتسلوا"

ليه كده, إيه المشكلة و ليه و محتاجين إيه:

لو مشغلتش الاغنية شغلها...
"ناقصين مؤذن و خليفة .."

ليه كده و ايه المشكلة:المشكلة اللي وصلتنا لكده هي زي ما سلمى كاتبة أن احنا متفرقين و مش متحدين; اخوان على شباب اخوان على على على....علي يا علي يا علي علي يا علي 

المشكلة اللي وراها أن احنا ثورتنا قامت على كره النظام و نسبة كبيرة من ده كمان كره لحسني مبارك و احمد عز و جمال و حبيب العادلي...بس !

ثورة قامت على كره النظام أكتر من حب أو رؤية أو هدف تروح عشانه تبقى ثورة بتعض في اللي قدامها بشكل كبير

ثورة بتعض في اللي قدامها بشكل كبير يعني سهل توجيها; عايزهم يهدوا, شيل العضاضة. هيعضوا فيك, حطلهم عضاضة يتلهوا فيها 

كانت سلمية ولكنها في رأيي زي الثورة الفرنسية; ثورة قامت للقضاء على نظام و لما شالت رموزه قعدت تقتل في نفسها
زي ما احنا بنعمل لكن احنا مؤدبين; بنشتم و نقسم بعد ائتلافت بس 

ده ليه ؟: عشان ما عندناش رؤية مشتركة: كل ما لدينا هو كره لشيء متعدد الاوجه و موحد الرموز
"ناقصين مؤذن و خليفة"

المشكلة التانية هي أن الوضع  النفسي للمصري قلب بتطرف للعكس; المصري قبل الثورة كان مستقل و مش مقدر قيمته, دلوقتي كل واحد فاكر إن بارادته أو بجروب على الفيسبوك هيقدر ينزل 20 مليون واحد للشارع 

و كل واحد بيحاول يمشي الناس (اللي هما كل واحد تاني) وفقا لإرادته

"سلمية سلمية"...كفاية والنبي

لو كانت "دموية دموية !" كان زماننا بخساير أكتر لكن في ال 18 يوم دول كنا دبحنا كل الشرطة و المحليات و القيادات الفاسدة و قلبنا امن الدولة و الداخلية اسكان عام 

-------------------------------

طب ايه الحل أو شكله عامل ازاي ؟

مشكلتي أني قوي الملاحظة لكن مش قائد; فأعرف احدد الفراغ القيادي شكله عامل ازاي لكن معرفش اعمل حاجة بصدده 

و اقدر اقول لكم إن الفراغ ده هيتملي لما حد فعلا يجسد مطالب و احلام الناس الغلابة

هيكون عنده رؤية و سايب نفسه يمثل الناس دونا عن توجيهاته و ارائه

هيوصل ليهم و هيديهم حلم, مش حاجة يعضوا فيها, بشكل بسيط و كلام يعقل و يتفهم و يتذكر بسهولة 

هيطلع فجأة و المجلس مش هيكون مدي خوانة و هيلم الناس وراه بشكل رهيب, هيديهم حلم و هدف و هما هيدولوا قوتهم و تاييدهم

(ده على أحسن الفروض انه ظهر و المجلس لسة ماسك)

و ساعتها, الشعب هيقول كلمته, فوق النشطاء و النخبة و الاعلام و الجيش و أي ابن تلاتين متنازلة عن حقها 

و مش هينزل عشان "يسقط نظام" (أو يطلب منه انه يسقط لو سمحت, زي ما عملنا فعلا)

هينزل عشان يحقق حاجة و يمسك هو زمام الأمور 

و اللي هيقف في وشه أو هيتحايل عليه هيقرقشه

و طبعا الجيش و الداخلية هيتعاملوا بغباوة و تقريبا هتكون نهايتهم....

انتهي الحلم