 |
| صورة من البوم المصور ايمن جمال (المشوار طويل) |
جايليك من صفوف الراحة, أول مرة اشوف وشك الحزين ده
عملتي إيه لاجل ما يحصل في ولادك كل ده ؟
سبت تربيتي على دكة الاستراحة و سمعت حكاويكي
علي ترابيزة قهوة ملخلخة و شاي تقيل بعد ما الورش قفلت
سامع قهرة مكتومة, بنفس شيشة و شفطة مالكوباية
و نكتة بضحكة خشنة لاجل ما يفضل البرج اللي فاضل على حيله
آه يا بلد الغلابة, حالهم يصعب على الكافر
لسة بينهشوا فيكي الديابة و صوتك مش واصل
بيتخانقوا على شكل جنينة السطوح
و سايبين الاساس اللي شايل المبني يلالي
عايشين في دماغهم و احلامهم و سايبينك
يلطش في ولادك العايب و يطلع دينك
نزلنا عشان حقهم
و بيسألوا مين حاسس بسيل دمهم
نزلنا عشان كرامتهم و لقمتهم
لقينا اللي طلعوا مخدوش حتي رأي واحد منهم
بيسألني من شباب الثورة بقول له آه
بيسأل طب عملت لنا ايه...معرفتش اقول له ايه
حكالي على الأقسام و المرور, خلاني اقول حلال فيهم الحرق
حكالي على الظلم في الاجور, خلاني أقول حكومة ولاد كلب
حكالي على الاعتقال من الدور, سكت...هقول ايه ؟
سألني الثورة عملت إيه, قلتله غيرت وشوش
بس الأهم غرزت امل, و لو بسيط, إن ممكن...جايز تغير يحصل
و أن الكبارات اللي في البلد فوق عشان فوق كتاف الغلابة دول
و لو طلع شيطانهم يقدروا يرموهم في الزبالة مطرح ما جم
لسة فيه مظاليم كتير
و مفيش حاجة بدأت حتي تضمن أن حقهم مش هيضيع تاني
و لسة حقهم بيضيع
للي عنده القدرة يعمل حاجة: عملت ليهم إيه ؟
No comments:
Post a Comment